Isa 18 | NdeIBE | STEP | Maye ngelizwe elilokuphaphazela kwezimpiko emifuleni yaseKhushi,

Isaiah 18

Isiphrofetho ngeKhushi

1 Maye ngelizwe elilokuphaphazela kwezimpiko emifuleni yaseKhushi,

2 elithuma izithunywa zihamba olwandle ngezikepe zemihlanga phezu kwamanzi. Hambani, zithunywa ezilejubane, liye ebantwini abade abalejwabu elibutshelezi, ebantwini abesatshwayo ezindaweni zonke, isizwe esilolaka, esilolimi olungaziwayo, esilizwe laso lehlukaniswe yimifula.

3 Lonke lina bantu bomhlaba, lina elihlala emhlabeni, lapho uphawu luphakanyiswa phezu kwezintaba lizalubona, lalapho uphondo lukhala lizaluzwa.

4 Lokhu yikho uJehova akutshoyo kimi: “Ngizakuba ngilokhu ngithule, ngikhangele ngisendaweni yami yokuhlala, njengokucwebezela kokutshisa ekukhanyeni kwelanga, lanjengenkungu yamazolo ngesikhathi sokuvuna.”

5 Ngoba kungakavunwa, lapho ukukhahlela sekudlule, amaluba esesiba livini elivuthiweyo uzaquma amahlumela ngezingqamu zokuthena aqume lengatsha ezinabayo, azisuse.

6 Zonke zizatshiyelwa izinyoni zasezintabeni ezidla inyama, lezinyamazana zeganga; izinyoni zizakudla ihlobo lonke, izinyamazana zeganga ubusika bonke.

7 Ngalesosikhathi izipho zizalethwa kuJehova uSomandla zivela ebantwini abade abalamajwabu abutshelezi, zivela ebantwini abesatshwayo ezindaweni zonke. Isizwe esilolaka, esilolimi olungaziwayo, esilizwe laso lehlukaniswe yimifula – izipho zizalethwa entabeni iZiyoni, endaweni yeBizo likaJehova uSomandla.